Gure buruaz gaindi dagoen Munduan barneratzeko proposamena da Beste mundu batzuk. Bidaia eguzki-sisteman barna izeneko erakusketa. Aire zabaleko museo bihurtu dute Sarasate pasealekua. Ibilbide zientifiko-artistiko bat egiteko aukera ematen du, planeta-sistemaren barrena ezagutzeko 40 argazkiren bidez. Michael Benson idazle, artista eta zinemagilearen lana da.
Sei hamarkadotako esplorazioetan roboten bidez lortutako argazki ederrak baliatu dituzte erakusketarako. Gure egunerokoan ikusmira jartzen ez diegun horiek dira protagonista.
Artea kalean programaren bidez ahalik eta publiko gehienera hurbiltzea bilatzen dute, museoetatik eta erakusketa aretoetatik aldenduta. Inaugurazio ekitaldia asteburuan eginda, urtarrilaren 9ra arte izanen da ikusgai. Bisita gidatuak ere egiten dituzte.
