Palestina Askatu. Israel borrokatu, desnormalizatu, suntsitu goiburuarekin eginen du manifestazioa Elkartasuna Palestinarekin plataformak. Maiatzaren 18an izanen da, bezperan, hilaren 15ean gogoratuko dute duela 76 urte sortu zela Israel Estatua. Nakba izanen dute gogoan. "Ezin dugu ahaztu egun hartan hasi zela herri palestinarraren kontrako jazarpen guztia. Palestina libre izateko, ezinbestekoa da Israelen desagerpena", salatu du Txuri Ollo plataformako kideak.
Genozidioaren aurka, errefuxiatutako pertsonen itzuleraren alde, preso politikoen askatasunaren alde eta Palestina osoa deskolonizatzeko eskaerarekin aterako dira kalera Iruñean ere: Maiatzaren 18an 12:30ean Basotxoan, Bosquecillon izanen da manifestazioaren hasiera.
Mobilizazio honen helburua "Palestinak Israelen partetik sufritzen duen ofentsiba ankerra salatzeaz gain, gatazkaren irtenbidea Palestinaren deskolonizaziotik eta Israelen desagerpenetik pasatu behar dela aldarrikatzea izango da", adierazi dute agerraldian. Horri lotuta, Mendebaldeko gobernu, enpresa eta instituzioek entitate sionistarekin dituzten harremanak salatzea eta eten ditzaten exigitzea ere badela jakinarazi du plataformaren izenean Txuri Ollok.
