“Hamar urte hauetan %6tik %12ra igo da absentismoa Landabenen” dio ELA sindikatuko Igor Peñalverrek, “Hau ez da onargarria, kateetan geroz eta lan zama handiagoa dago eta lan errepikakorrak gure osasunean eragina du”. Modelo berrien ekoizpenak gainera ez du egoera lasaiagoa izaten lagundu. “Geroz eta gehiago eskatzen digute, geroz eta langile gutxiagorekin gehiago egitera behartzen gaitu enpresak” salatu du Peñalverrek, “Auto berri hauek osagarri gehiago dituzte muntatzeko eta ibilgailuetan jartzeko eta horrek lan zaman eragina izan du”.
ELA sindikatuko ordezkariak argi du, lan zama banatu behar da, langileen osasuna zaintzeko. “Behar ditugu langile gehiago kateetan, orain bost pertsonaren artean egiten duguna seiren artean egitea” azaldu du Igor Peñalverrek, “Horrek ez du eraginik izango auto ekoizpen kopuruan baina bai langileen osasunean”.
