Hirirako proiektuak garatzeko inbertsioak, auzoetarako hobekuntzak, bizikidetzan aurrera egiteko planak eta gastu sozialera bideratuko dutena azpimarratu du Iruñeko alkate Joseba Asironek aurrekontuak aurkezterako unean. Ia 267 milioi euroko aurrekontua aurkeztu dute Iruñeko Udala osatzen duten alderdiek. "Geldialditik Iruñea aurrera aterako duen proposamena egikaritu dugu", nabarmendu du Asironek. Agerraldian EH Bilduko gainerako zinegotziekin batera izan dira Geroa Baiko Koldo Martinez eta Mikel Armendariz zein Contigo-Zurekineko Txema Mauleon ere.
"100 eurotik 41 gastu sozialera bideratuko ditugu eta 100 eurotik 20 auzo eta hiriaren hobekuntza lanetarako", esan du alkateak. Proiektu handien artean jarri ditu hauek: Sarasate pasealekuaren urbanizazio lana, Sanduzelai auzoko biribilgunerako ideien lehiaketa, Pio XII.a etorbideko lanak amaitzea, Erorien Monumentua, Erripagaña auzorako Civivoxa edota pilotaren interpretazio zentroaren sorrera.
Etxerik gabekoentzat irtenbide "osoa"
Arloz arlo xehetu dituzte ildo nagusiak. Horien artean, Sustapen Ekonomikoko eta Europar Proiekzioko zinegotzi berezi Koldo Martinezek nabarmendu du belaunaldien arteko erreleboa ziurtatzera joko duela. Gizarte Ekintzako zinegotzi Txema Mauleonek berriz, lau ardatz nagusi nabarmendu ditu: etxez etxeko arreta indartzea, zentro okupazional berriaren sorrera, familiei laguntzak eta etxerik gabekoei arreta integrala, osoa eskaintzea.
Etxebizitzarena ere gai nagusitzat joa du udal gobernuak eta bide horretan arrazoizko prezioa izanen duten etxebizitzak sustatuko dituzte. Martxoaren 27ko osoko bilkuran onartuko dute behin betiko 2024rako Iruñerako aurrekontu proiektua.
