Gurutze plazari buruz Iruñeko Udalak egin nahi duen galdeketa "eskumen inbasioa" izan daitekeela salatu dute

Euskalerria Irratia 2023ko aza. 23a, 13:53
Ignacio Bidegain eta Mertxe Zufia Gurutze plazako Parking Ez plataformako kideak.

Gurutze plazako berrantolaketa eta parking berri bat eraikitzea bi proiektu dira. Panking Ez plataformako kideek uste dute lehenaren eskumena udalbatzarena dela eta ez Iruñeko Udalarena eta hartara zalantzak dituzte legezkoa ote den galdetegi bat egitea bere eskumenekoa ez den egitasmoaren inguruan. "Errekurtso bat jarri dugu Udalean egoera salatuz", azaldu dute plataformako kideek. Hamar egun barru erantzun beharko dio Udalak. 

Iruñeko Udalak abenduaren 11tik 17ra martxan jarri nahi duen galdetegia zalantzazkoa dela jakinarazi dute gaur Gurutze plazako parkinaren eta plaza hori berrantolatzeko proposamenaren kontra dauden bizilagunek. Izan ere, bi gai daude horren baitan: 346 plaza izanen lituzkeen parkingaren plana batetik, eta bestetik, Gurutze plaza bera eraberritzeko egitasmoa. Parkingaren eskuduntza bai, Udalarena da, baina zalantzak dituzte plazaren berrantolaketa udalbatzarena ez ote den. Eta udalbatza osatzen duten alderdien gehienak aurkeztutako proiektu horren kontra daude. Eskumen inbasioa egon daitekeela uste dutelako errekurtsoa jarri dute Udalean.

Galdeketa eginen du auzoan baina zehaztasun gabe: galdetegia hutsa da, ez dute azaltzen nork erantzun dezakeen eta noren ahotsa hartuko duten hartara aintzat. Galdeketaren aurretik egokia litzateke Panking Ez plataformaren ustez aztertzea zein den benetako egoera. Izan ere, Gurutze plazatik hamar minutura kotxeak aparkatzeko zenbait parking daude, guztira 700 lekurekin.  "Bidegabekeria da galdetegia bera: diseinu aldetik inprobisatua, orekarik gabea eta baztertzailea", esan dute.

"Gurutze plaza jende askoren geraleku da. Eta askok ez dute parte hartuko galdetegian: Institutuko ikasle eta irakasleak, adinduentzako zentroetako erabiltzaileak eta beste", azaldu dute. "Ez dago zehaztua zein errolda hartuko duten kontuan", diote.

Agerraldia egin dute gaur salaketak egiteko, eta, Institutuak bere babesa adierazteko pankarta bat zintzilikatu du: Orain kendu nahi dituzten arbolak bihar arnastu ahal izateko beharko ditugu dio.

EUSKALERRIA IRRATIAzale hori:

FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.

Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.

Izan ere, zenbat eta komunitate handiagoa, orduan eta proiektu komunikatibo eraginkorragoa.


Bazkidetu zaitez!