Bi langileren heriotzak salatu ditu LABek

Iosu Ganuza Garcia 2022ko mai. 5a, 17:00

Apirilaren 30ean kamio gidari bat VWen Landabengo plantan "hilik" agertu zela eta Nafarroako Unibertsitate Ospitalean garbitzaile bat hil zela asteartean baieztatu dute.  

LABek salatu du azkeneko egunetan bi langile hil direla Iruñean. Batetik, sindikatuak zehaztu du "joan den ostiralean, apirilaren 30ean, kamioilari bat hilda" agertu zela "Volkswagen faktoriako hornitzaileen aparkalekuan", Landabenen. Bestetik asteartean "Nafarroako Unibertsitate Ospitalean garbitzaile bat hil zela" adierazi du ohar bidez. Modu honetan 25 lirateke lanean edo lanpostuan hildako beharginak urtea hasi denetik. 

LABek "une latz hauetan elkartasuna" helarazi die lankide eta senideei.

Gertakariei dagokienez, kamioilariaren heriotzaren berri "Volkswageneko ekoizpen katean pieza batzuk falta zitzaizkiela ikusirik, kateako langileak enpresa hornitzailearekin jarri ziren harremanetan, eta honek bere kamioia geolokalizatu zuten" zehaztu du LAB sindikatuak. Foruzaingoak topatu zuen gorpua. Salatu dute "piezak falta zirelako" topatu zutela kamioilaria hilik, ez bera falta zelako. Horregatik gizarte gisa "ausnarketa" egiteko deia luzatu dute eta garraioaren sektorearen prekarizazioa salatu dute. 

Bestalde, aipatu bezala, maiatzaren 3an, 20:30 aldera, Maju garbiketa enpresako 62 urteko langile bat Nafarroako Unibertsitate Ospitaleko aldageletan hil zen, Iruñean. "Heriotzaren arrazoiak ikertzen ari dira oraindik" zehaztu du abertzaleen sindikatuak.

Heriotza honi dagokionez "Nafarroako Osasun Publikoaren eta Lan Osasunaren Institututuak zein Lan ikuskaritzak euren gabezia larriei konponbidea" jartzeko eskatu die eta "ezagunak diren arrisku gune eta egoera jakin horietan" beharrezko kontrol neurriak jartzeko. 

EUSKALERRIA IRRATIAzale hori:

FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.

Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.

Izan ere, zenbat eta komunitate handiagoa, orduan eta proiektu komunikatibo eraginkorragoa.


Bazkidetu zaitez!