Hilabete eta erdiko oporraldiaren ostean, bihar, asteartearekin, Iruñeko Udalaren udako kultur programazioak Gazteluko plazako txistu eta gaita kontzertuei ekingo die. Astearte eta ostegunetan, irailaren 23ra arte, pasodobleak, polkak, zortzikoak, porrusaldak edo kalejirak entzungo dira, Iruñeko Txistulari Taldea eta Iruñeko Gaiteroak protagonista dituzten emanaldietan.
Abuztuan zehar, kontzertuak 19:00etatik 21:00etara izango dira, Gaztelu plazako kioskoan. Irailean, ordutegia ordu erdi aurreratuko da eta emanaldiak 18:30etik 20:30era izango dira. Udako programazioan ohikoak diren kontzertu hauek ekainaren 15ean hasi ziren eta bi astez luzatu ziren, uztailaren 1era arte. Ondoren, etenaldia egin zuten.
Jarduera horiek Iruñeko Txistulari Taldea eta Iruñeko Gaiteroak elkarteek Iruñeko Udalarekin dituzten kontratuetan sartzen dira. Ospakizun instituzionaletan laguntzeaz gain, kontratuak beste hitzordu batzuk ere baditu, hala nola txistu eta gaita kontzertuak, dianak eta herriko jaiekin lotutako beste tradiziozko batzuk.