Navarra Suma de Burlatak iragarri duenez, Navarra Suma eta PSN 2021eko aurrekontuak onartzeko akordiora iritsi dira. Eskuineko hirukoak uste du "herritar guztien bizi-kalitatea suspertzearen eta hobetzearen" aldeko apustua dela, "tokiko ekonomia dinamizatu eta herria suspertzeko". Sergio Barasoain talde sozialistako bozeramaileak ohar batean azaldu duenez, Covid-19aren pandemiak "ezohiko eta premia larriko" egoera sortu du, eta, horregatik, "ez da une txarra adostasuna lortzeko". Barasoainen esanetan, ez da "aretoko eta postureoko politika egiteko" garaia.
PSNk egindako ekarpenei dagokienez, eskuinak nabarmendu du proposamen guztiak bat datozela Burlatako herritarrekin duten konpromisoarekin. Kultur, kirol, tokiko merkataritza sustatzeko diru-laguntzak, Udaltzaingoarentzako genero indarkeriaren eta LGTBI inguruko prestakuntza edo animalien ongizateari buruzko jarduerak jasotzen dira sozialisten proposamenen artean.
Na+ek ziurtatu duenez, PSNrekin "elkarrizketa erraza" izango duela eta akordioak lortzeko prest agertu da "Burlatako gobernagarritasuna hobetzeko eta herritarrek merezi duten egonkortasuna lortzeko".