Murtzia-II espetxetik Virgen de la Arrixaca ospitalera eraman zuten Patxi Ruiz presoa, bartu “gaueko azken orduan”, Amnistiaren Aldeko eta Errepresioaren Aurkako Mugimenduak ohar bidez adierazi duenez. Presoaren sendia Murtzian dago dagoeneko eta haien konfiantzazko medikua ere ospitalera bidean dago, oharraren arabera.
Patxi Ruizek hamabigarren eguna du gose eta egarri grebarn, espetxeko funtzionarioen partetik jasotako mehatxuak salatzeko. Oharrean azaldu dutenez, atzo mediku proba zenbait egin zizkioten, espetxean, eta ikusi zuten arazoak zituela giltzurrunetan. “Oraindik bere kabuz ibiltzeko gai da baina bere egoera oso larria dela eta hiltzeko benetako arriskua dago”, gaineratu dute.
Asteazkenean jakin zen Espainiako Auzitegi Nazionaleko Espetxe Zaintzako Epaitegi Zentralak presoaren osasunari eta espetxean duen egoerari buruzko txosten bat eskatu ziola kartzelari. Hala azaldu zion Ainhoa Mejias presoaren abokatuetako batek Argia astekariari. Ondorioz, Ruizek esan zuen seruma jasotzea onartuko duela, baldin eta ANk auto batean hori ezartzen badu, eta haren ospitaleratzea kontrolatzen badu.