Berdintasun Batzordeak onartutako adierazpen instituzional baten bidez, Uharteko Udalak erasoa gaitzetsi zuen eta biktimari elkartasuna adierazi zion, "egoera gainditzeko beharrezko babesa" emanez. Udaleko iturriek Diario de Noticias egunkariari jakinarazi diotenez, erasoa emakumearen etxean gertatu zen. Emakumeak berak eman zuen gertatutakoaren berri, telefonoz, eta Guardia Zibila bertaratu eta gizona atxilotu zuen, etxetik irtetera zihoala.
"Emakumeen aurkako indarkeriak errealitate izaten jarraitzen du gure gizartean, eta haien oinarrizko eskubideen urraketaren adibide argia da. Adierazpen ugari ditu eta, horregatik, beharrezkoa da indarkeria hori gainditzeko politika publikoak garatzen jarraitzea ", salatu du udalak adierazpen instituzionalean. Era berean, azpimarratu du koronabirusarengatik alarma egoera deklaratu ostean, emakume asko zaurgarritasun egoeran daudela etxebizitzetan egoteko betebeharragatik.
Gaitzespen gisa, mugimendu feministak, gaur, arratsaldeko 20:00etan, leihoetatik eta balkoietatik kazerolada egitera deitu ditu Uharteko herritarrak. “Erasorik ez erantzunik gabe", adierazi dute.