Korrika 21

AEKko Iruñezar euskaltegitik egin dugu Irrintzi Plaza saioa

Euskalerria Irratia 2018ko abe. 12a, 18:28

AEK euskaltegiko irakasle berri eta ohiak, egungo ikasleak, Urko Aristi kazetaria eta Albaro Arteta eta Javier Lopez Jaso musikariak izan ditugu gurean zuzenean. 

Euskal kazetaritza eta euskaltegiak gerturatu ditugu beste behin. Baina gu izan gara mugitu garenak oraingoan. Iruñeko AEKko Iruñezar euskaltegitik egin dugu Irrintzi Plaza. Ederki ongi hartu gaituzte gainera, pastak eta guzti!

Iruñezar euskaltegiko Jabi Tejedor eta Nafarroako AEKko arduradun Xabi Gartziarekin AEKz eta egungo egoeraz aritu gara solastean. Gero eta gertuago dugu 21. Korrika. Asier Biurrun Nafarroako Korrikako koordinatzaileak datorren edizioaren xehetasun guztiak eman dizkigu. 

Atzera begira ere jarri gara. AEKko beteranoen tertulia osatu dugu horretarako. Anatxo Manzanos, Alixi Urrestarazu eta Jabi Tejedor aritu dira Reyes Ilintxetarekin batera beraien hasierako uneen eta anekdoteen inguruan solasean. 

Euskal kazetaritza euskaltegietara gerturatzeko, Urko Aristi kazetaria gonbidatu dugu saiora. Haren ibilbideaz aritu da hizketan. 

Zuzeneko musikarekin osatu dugu saioa. Alberto Arteta saxofoi jotzailea eta Javier Lopez Jaso akordeoilaria izan dira saioari soinu banda jarri diotenak.

Ikasleei ere eman nahi izan diegu hitza. Alacanteko Cesar, Italiako Paola eta Martzillako Martaren bizipenak ezagutu ditugu. Amaitzeko, irrintzi mirrintzi lehiaketa ere egin dugu, eta sari bat edo beste eskuratu dute. Zorionak!

EUSKALERRIA IRRATIAzale hori:

FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.

Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.

Izan ere, zenbat eta komunitate handiagoa, orduan eta proiektu komunikatibo eraginkorragoa.


Bazkidetu zaitez!