Euskara Merkataritza programaren sustatzaile diren Iruñerriko bederatzi udal (Antsoain, Aranguren, Atarrabia, Berriobeiti, Berriozar, Burlata, Oltza Zendea, Uharte eta Zizur Nagusia), Gares eta Barañain dira hiztegitxoen lehiaketaren antolatzaileak. Bezeroak aktibatzeko egitasmo hau bigarren aldiz egiten ari dira abendu eta urtarrilean zehar.
Aurrez IKA euskaltegiek sortutako hiztegitxoak hartu dituzte eredu moduan, bezeroei nahiz merkatariei euskara erabiltzeko laguntza eskaintzeko asmoz. Horretarako, saltokietan nahiz egunerokoan ohikoak diren euskarazko hainbat termino eta esamolde jaso dituzte hiztegitxo horietan. Hiztegitxo horiekin lehiaketa bat antolatu dute, gainera. 5 motatako hiztegitxoak daude, kolorearengatik erraz bereizten direnak (laranjak, urdinak, berdeak, granateak eta lilak); kolore bakoitzetik 5.000na ale banatu dira. Parte hartu nahi duenak egin beharrekoa oso sinplea da: kolore bakoitzeko hiztegitxo bana bildu eta, 5ak eskura dituenean, guztiei batera argazkia atera eta whatsapp bidez 692 730 246 zenbakira bidali behar du urtarrilaren 31 baino lehen.
Parte hartzen duten guztien artean 100 euroko 3 erosketa bonu zozkatuko dira.
Honen inguruko informazio guztia ekarri digu Joseba Beltza, proiektua aurrera daraman Emun Kooperatibako teknikariak.
