Zazpigarren aldiz herri lasterketa izanen da leuzemiaren aurka. DOMENAk, Nafarroako Hezur-Muinaren Emaileen Elkartea, La Unica Rugbi taldeak eta Alegria de Iruña peñak antolatu dute aurtengo lasterketa. Burlatan izanen da, atletismoko pistetan hasi eta amaituko dena. Ekainaren 20an 20:00etan izanen da herri-lasterketa eta 5 kilometro egin beharko dira korrika.
Izen-emateak internet bidez egin daitezke 5 euroan: www.todoscontralaleucemia.com webgunean. Kamisetak Futbolmanias dendan hartu daitezke, Zapateria kaleko bederatzigarrenean.
Hezur-muina ematearen garrantzia
Leuzemiaren kontrako lasterketa izanen den arren, gaixotasun horri aurre egin ahal izateko hezur-muina ematearen garrantziaz ere ohartarazi nahi dute antolatzaileek. Izan ere, jende askok pentsa dezakeenaren kontra, oso erraza da hezur-muina ematea, ez du minik egiten eta biziak salba ditzake. Azken urteotan kontzientziazioa hazi egin da nafarren artean eta denbora gutxian 3.000 emaile izatetik 11.200 izatera pasa da.
