Foruzaingoak jakinarazi duenez, 04:36an aurkitu dute motor gidari baten gorpua PA-30 errepidean, Taxoare parean. Hildakoa Uharteko 49 urteko bizilagun bat da, lanera zihoana. Dirudienez auto batek emandako kolpearengatik errepidetik atera eta bertan hil da.
Motorraren atzealdean kolpe handi bat ikusi dute eta auto baten aleroi zatiak aurkitu dituzte ezbeharra izan den tokitik gertu. Auto gidariak ihes egin du. Handik ordu batzuetara Belosoko polizia etxera gizon bat Joan da, abokatuak lagunduta, esanez bera zela istripuaren erantzulea. Positiboa eman du alkohol proban eta Foruzaingoak atxilotu du. Itzako Zendeako 39 urteko bizilaguna da. Asteazkenean deklaratu beharko du epailearen aurrean. Zuhurtziagabekeriazko giza hilketa eta laguntzeko betebeharra ez betetzea leporatzen diote.
