Gobernu aldaketak politika aldaketa ere ekarriko du Nafarroan, besteak beste, euskaran, hezkuntzan, osasungintzan, lurraldetasunean edota ingurumenean. Gaur, irakaskuntzaren sektoreko kide birekin mintzatu gara: EILAS sindikatuko Kepa Yecora eta Sortzen Elkarteko Gari Torregrosa. Gaur hasi ditu Udako Euskal Unibertsitateak Iruñeko saioak Jaso Ikastolaren egoitzan. "Euskal Herriko gatazkaren irakurketa etorkizuneko bake feministaren bidean" izenburuko ikastaroaren arduradun, Oihana Etxebarrietari egin diogu elkarrizketa. Nerea Mendizabal psikopedagogoak beste ikastaro interesgarri baten berri eman digu: "Harremanak zaintzeko nola hitz egin eta nola entzun". Musikaren tartean, Carles Belda, Zugarramurdin bizi den musikari kataluniarra izan da gurean. Zenbait abesti modu akustikoan eskaini dizkigu.
