Guardasola

Auto gehiegi dabil gure hirietan. Kutsadurak gora egin du. Iruñean, KarKarCar izeneko ekimena jarri dute abian. Auto elektrikoak zenbait lagunen artean partekatzeko proiektua da. Oraingoz, aplikazio honen bitartez bidaia laburrak egiten ari dira Iruñeko zenbait auzotan eta Iruñerrian ere.

Palestinaren aldeko ibilaldia burutuko dute datozen bi asteotan. Ebrotik Kantauri itsasoraino eginen dute bidea. Modu horretan, Jordan ibaitik Mediterraneo itsasora iristen den Palestinako lurraldea gogora ekarriz. Tuteratik irailaren 12an abiatuko da eta hilaren 20an amaituko da Hendaian. Palestinaren alde Euskal Herri osoan zabalduta dagoen elkartasun sare herritarraren laguntza izanen dute.  Bide batez, okupazioa eta genozidioa babesten eta sustatzen duten nenpresak eta erakundeak salatuko dituzte.

Irailaren 2tik 13ra Nafarroako Musika Garaikidearen Jaialdia ospatuko da. Oraingo eta etorkizuneko luthierrak izanen dira protagonista. Musika tresnak egiteko artisautza tradizionala eta egungo adimen artifizialak zabaltzen dituen aukerak aztergai eta entzungai izanen dira, Iruñean. Xabier Olazabal akordeoilari eta txistulariak eman dizkigu xehetasunak Euskalerria Irratian.