Hizkuntza, kultura eta gizarte-aniztasuna aztertuko dituzte eta elkarbizitzarako bideak eta ikuspuntuak partekatu, NUPen

Euskalerria Irratia

Hizkuntza, Identitatea eta Aniztasuna elkarbizitza jomuga, aunitz begirada izeneko jardunaldia eginen dute gaur Nafarroako Unibertsitate Publikoan 09:00etatik 13:30etara. 

Gaurko topaketak ikuspegi eta esperientzia desberdinak dituzten adituak eta pertsonak bilduko ditu, aniztasunetik kohesionatutako gizartea eraikitzeko erronkak eta aukerak aztertzeko. Jardunaldian lau erakunde antolatzaileetako ordezkariek parte hartuko dute: Maider Beloki Unzu, Iruñeko Udaleko Kultura, Festa eta Kirol zinegotzia; Ana Urkiza Ibaibarriaga, Eusko Ikaskuntzako lehendakaria; Ana Ollo Hualde, Nafarroako Gobernuko bigarren presidenteordea; eta Martín Larraza Kintana, NUPeko ikerketa errektoreordea.

Hitzaldien artean Izaskun Andueza-Imirizaldu soziologo, irakasle eta NUPeko ikertzailea dago. Nafarroako hizkuntza ereduetan eta kultura arteko bizikidetzan oinarrituko da, hezkuntza eta komunitate esparrutik, Altsasu eta Berriozarko esperientziei erreferentzia eginez. Yasmine Khris Maansri Marseillan jaio eta Iruñean bizi den kazetari, itzultzaile eta interpreteak ere bere esperientzia pertsonala erakutsiko du, euskararen ikaskuntzan duen esperientzia eta hizkuntzak harremanen sorkuntzan, identitatearen eraikuntzan eta pertenentzia-sentimenduan duen papera partekatuz.

Laura Igantzi Mitxelena, Euskal Artzainak Ameriketan elkartearen sortzaile eta lehendakaria, Estatu Batuetara emigratu zuten euskal artzainen oroimenean oinarrituko da, euskal nortasuna, kultura eta hizkuntza jatorrizko lekutik milaka kilometrora gorde, eraldatu eta transmititu ziren erara hurbiltzeko. Beste hitzaldi bat Beñat Garaio Mendizabal ikerlari eta hizkuntza biziberritzeko prozesuen dinamizatzailearena izango da. Euskararen biziberritzearen inguruan parte hartzeko guneak sortzeko beharraz arituko da.

Azkenik, Xabier Aierdi Urraza soziologo eta Begirune Fundazioko presidenteak Nafarroako hizkuntzaren eta identitatearen arteko harremana eta askotariko gizarteetako identitate-eraikuntzaren prozesuen konplexutasuna aztertuko ditu. Hitzaldiekin batera, NUPeko irakasle Artzai Gaspar Arraizak moderatutako mahai-inguru batek eta bertaratutako publikoarekin elkarrizketa txanda batek hainbat ekarpen bateratzeko aukera emango dute.

EUSKALERRIA IRRATIAzale hori:

FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.

Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.

Izan ere, zenbat eta komunitate handiagoa, orduan eta proiektu komunikatibo eraginkorragoa.


Bazkidetu zaitez!