Gari Arregi, Ane Loizate eta Ivanna Jiménez izan dira gelaren ordezkariak. Joseba Asiron alkatearekin batera balkoira atera, eta sanferminetako ohiko aldarria egin dute: «Iruindarrak, gora San Fermin!». Ondoren, botoia sakatu dute, eta, adingabeek piroteknia erabiltzerik ez dutenez, sistema elektroniko baten bidez leherrarazi dute suziria Udaletxeko teilatutik. Eztandak eta plazan bildutako haurren zein familien algarek hasiera eman diote ekitaldiari.
Hiru ikasleak balkoira igo diren bitartean, gainerako ikaskideek Harrera Aretotik jarraitu dute unea. Balkoitik bertatik ikusi dute plaza mukuru beterik. Iruñeko Udalak hiriko ikastetxeetako 4. eta 5. mailako ikasleei zuzendutako hezkuntza egitasmo baten bidez aukeratu zuen gela irabazlea, zozketa bidez.
Ekitaldiak uztailaren 6ko Txupinazoaren giroa berriz sortu nahi izan du, baina haurren neurrira. Klarinak eta tinbalak ere entzun dira, oraingoan haurrek joak, eta suziriaren ondotik gaitero txikiak abiatu dira Karrika Nagusirantz, kiliki eta buruhandien laguntzaz.
Udaletxe plaza haurrez bete da. Erraldoi eta Buruhandien Konpartsak hainbat dantza eskaini ditu, eta peña txikiek, txarangek nahiz dantza taldeek ere bat egin dute ospakizunarekin. Txupinazo Txikia izan da Haurren Eguneko berrikuntza nagusia, belaunaldi berriak sanferminen erdigunean jartzeko asmoz.