Iruñeko Jaso ikastolaren eraikin zaharra hustu dute sutea piztu delako. Sua arratsaldeko 17:00etan piztu da, Arostegi etorbideko eraikinean. Cordovillako suhiltzaileak, prebentzioan oinarrizko bizi-euskarria duen anbulantzia, Udaltzaingoa eta Foruzaingoa bertaratu dira eta suhiltzaileak sutea itzaltzeko lanean ari dira; ez da zauriturik izan.
Eraikina berez hutsik dago eta eraitsi gabe, baina azken aldian etxegabetasun egoeran dauden hainbat pertsona eraikinean bertan ezarri dira. Udazkeneko lehenengo hotzaldiarekin batera Dar Etxea elkarteak salaketa egin zuen eta hiru eskaera egin zizkion udalari: eraikin hutsak birgaitzeko, erroldaren gisako oztopo administratiboak kentzeko eta etxebizitza huts guztiak "zirkulazioan" jartzeko.
Sutearen ondorioz, eraikina jendez hustu dute, eta ez da kalte pertsonalik izan suhiltzaile zerbitzuak jakinarazitakoaren arabera.