Elkartasunak bide berriak topatzen ditu. Uztailaren 27an Hatortxu Rock erraldoi bati agur esan eta gero, Aske jaialdiak lekukoa hartu dio eta bihar, abenduaren 27an irekiko ditu ateak lehenengo aldiz.
Euskal preso politikoen, iheslarien eta deportatuen egoera salatzeko eta presoen sakabanaketak zigortutako familiei elkartasun ekonomikoa emateko sortu zuten Hatortxu Rock, 1999an, eta egitasmoa 30 aldiz antolatu eta gero “aske izan nahi dutenen aterpe” bilakatu da jaialdia. Garazi Castaño aske jaialdiko antolatzaileak azaldu moduan, "26 urteko ibilbideari uko egin gabe auzolanaren ariketari eutsi nahi genion, gure lanabes garrantzitsuena delako". Indibidualismotik eskapo, elkarlanean aritzeko ekitaldia izango da Aske jaialdia.
Oholtzan izango diren hamabost taldeen artean askotariko musika generoak eta "talde euskaldun gazte zein esperientziadunak", izango direla azaldu dute antolatzaileek. Merina Gris, Neomak, Hazas, Gozategi, Kaparrak, Janus Lester, Nafarroa 1512, Streetwise, Juantxo Skalari, The Clayton, Chuleria, joder!, Dodosound, Marte Lasarte, Bisaiak eta Sustrai Berriak izango dira taula gainean.
Eta sorpresa hori ere ezagutzen dugu dagoeneko. Euskal Herriko trabestiak izango dira jaialdian. Maruxak, Haizemin eta Posidonia, Celeste Poliester, eta Albina Stardust eta Divina Comedia.
Askatasunerako bidean, erabateko boikota erdiestea zaila den arren, jaialdiak Palestinako herriari, eta Israelen kontrako boikot dinamikarekin bat egin du. Hartara, barran ez da israeldar jatorriko produkturik izango eta sukaldean Nafarroako produktuak lehenetsiko dituzte. Bihar beraz, aske jaialdiak bere lehendabiziko aldia ospatuko du Atarrabian.
Sarrerak askejaialdia.eus webgunean eskuratu daitezke.
Ver esta publicación en Instagram