Mercaderes karrikako 18. zenbakia obretan dago, baina bertan ez da langilerik ikusten. Ataria obra hondakinez beteta dago, lurra altxatuta eta zenbait pasabide zurkaiztuta daude. Baina bizilagunek ez dakite zertarako diren lan ikusezin horiek. “Vidaurreren azken eskaintzari ezetz egin eta hurrengo egunean hasi ziren obrak” azaldu du Angela Uriguen bizilagunak, “Obra hondakinak nonahi, igogailua itxita, bizilagun zenbait ur berorik gabe, beste batzuk internet konexioa moztuta…beste modu batera esanda, jazarpen inmobiliarioa egiten ari da Vidaurre gure kontra”.
Eraikuntza enpresaren helburua, maizter hauek kanporatu eta bertan 11 etxebizitza turistiko ezartzea da, horretarako lizentzia baitu. “Garrantzitsua iruditzen zaigu azpimarratzea turismoaren negozioak ondorio kaltegarriak dakarzkiola langile-klase osoari eta inguruneari, bereziki Alde Zaharra bezalako auzoetan” adierazi du Uriguenek, “Ondorio horien artean daude bizilagunak beren bizitokitik kanporatzea, modu zuzenean, ostatu turistikoak egiteko lehen bertan bizi ziren inkilinoak kaleratzen dituztenean, eta baita zeharka ere, prezioen igoeraren eta aukera-faltaren eraginez, sektore pobretuenek auzotik alde egin behar izaten dutenean edota gazteak ezin direnean beren auzoan emantzipatu. Horiez gain, badira beste ondorio negatibo batzuk ere, besteak beste lan[1]baldintza prekarioak eta bizitzaren garestitzea eta espazio eta sare komunitarioen degradazioa; izan ere, turismoaren negoziotik etekinak ateratzen dituzten horien zerbitzura jartzen da hiria”. Prentsa aurrean agerraldia amaituta, obra hondakinak Vidaurre-VDR enpresaren egoitzara eraman dituzte bizilagunek, Iruñerriko Etxebizitza Sindikatu Sozialistako kideen laguntzaz.
Mercaderes karrikako 18. Zenbakiko bizilagunak, Iruñerriko Etxebizitza Sindikatu Sozialistarekin batera “Vidaurreri Aurre!” lelopean antolatu dira eta dei egin die Alde Zaharreko beste auzokideei, antolatuko diren protestetan parte hartzera.