“2015ean sortu genuen talde ‘makers’ bat, XXI. mendeko teknologiekin aritzeko eta hori zabaltzeko” azaldu du Xabier Leonardok. Eta egun, Protomakers enpresa bilakatu da hori. Haien lana gazteengana gerturatzeko hiru tailer proposatu dituzte: 3D inpresioa eta fabrikazio digitala, robotika, eta errealitate birtualeko tailerra. Ordu eta erdiko tailerrarekin oinarrizko ezagutzak garatzen dituzte, zer diren eta nola erabiltzen diren.
“Hazi gara teknologiarekin eta badakigu edozein gauza egiteko aukera ematen digula”, azaldu du. “Ordu betean zerbait diseinatzeko, fabrikatzeko eta etxera eramateko” balio dutela tailerrek erakutsi nahi dute. Gainera, “fabrikazio lokala” eginda.
“Gu gazteak gara eta gazteak behar ditugu gure proiektura batzeko”, gaineratu du Leonardok eta jardunaldiak ere baliatzen dituzte jende berria fitxatzeko.