Nafarroako Gobernuarentzat estrategikoak diren hiru alor uztartzen ditu Sarean Euskaraz ekimenak: euskara, gazteria eta teknologia berriak. “Nik laugarren alor bat gehituko nuke: ongi pasatzearena. Euskara ez da museoko pieza bat, bizitzeko tresna eta hizkuntza izan behar da”, adierazi du Ana Ollok, Nafarroako lehendakariordeak eta Memoria, Bizikidetza, Kanpo Ekintza eta Euskara kontseilariak. 900 ikaslek parte hartu dute hiru areto desberdinetan banatuta antolatutako lantegi eta ekimenetan. Ana Olloren aburuz, “euskara ez da soilik ikastetxeetan hitz egin behar den hizkuntza bat edo gure ondare historiko soil bat. Gaurkotasun balore bat da. Erakutsi behar diegu gure gazteei euskarazko sortzaileak ere badaudela eta teknologiak ere gure hizkuntzan garatzen direla eta kalitatezkoak direla gainera”.
Gaurkotasun politikoaz ere mintzatu da Ollo kontseilaria. Nafarroako Gobernua lanean ari da 2026ko aurrekontuen zirriborroa prestatzen. “Momentu honetan alderdien arteko negoziazioak martxan daude eta departamentu bakoitzak ere bere proposamenak lantzen dabil. Alderdi ezkertiarren arteko akordiora iritsiko garelakoan nago”. Euskararen arloan lehentasunez galdetuta, “euskara administrazioan zabaltzea, baina baita kalean eta gizartean euskararen presentzia indartzea” nabarmendu ditu Ana Ollok.