Urriaren 4an hasita, Arte Positiboa ekimenak berriz piztuko ditu Arrotxapeako erakusleihoak. Aurtengoan, hamar artistek parte hartuko dute aldi berean Iruñean, Sare elkarteak antolatutako Arte positHIVo ekimenean. Helburua argia da: GIBari lotutako estigma soziala deseraikitzea eta gaixotasun honekin bizi diren ehunka lagunei ikusgarritasuna ematea. GIB edo Giza immunoeskasiaren birusak 100.000 nafarretik bosti eragiten die. Iaz erraterako 27 kasu hauteman ziren, eta 2023an 34.
Arrotxapea auzoa galeria ireki bihurtuko da urriaren 4tik 19ra. Miss Bogie, Maikampanilla, Ibai Andueza, Garazi, Jaime Remírez de Ganuza, Luna Martinikorena, X8A, Kontxesi San Juan, Irati Segura eta Verónica Ferrero artistek euren sormena eta konpromisoa erakutsiko dituzte hainbat gunetan: Calzados Rotxan, Salviasen, Polikiroldegian, Txaro Modan, Zokoa tabernan eta La casa del río Ogiberri okindegian. Gainera, bisitariek aukera izanen dute euren obra gogokoenaren alde bozkatzeko, sormenaren indarra eta mezu sozialaren garrantzia baloratuz.
Pride Positiboaren laugarren edizioaren parte da ekimen hau, 2022an sortu zen GIB eta HIESA eritasunen inguruko kontzientziazioa lantzen duen Cesida koordinakundearen eskutik. Iruñean Sare GIB-HIESA elkarteak hartu du ekinbide hau garatzearen ardura.