Neguko eguraldi hotza eta musika aretoetako giro beroa. Gabonetan, abenduaren 25etik urtarrilaren 5era bitartean, ospatuko dute aurtengo Santas Pascuas jaialdia. Hiriko musika eszenako musikariak eta nazioartean arituak diren musikariak elkartzen ditu jaialdiak, indie, pop eta rock estiloen doinuen artean.
Aurten gainera, agertoki gehiagotara iritsiko da musika. Baluarten, Zentralen, Canallan eta Indaran izango dira kontzertuak eta Civicanen doako ziklo bat antolatu dute. Ziklo honek argazki erakusketa bat, kontzertu akustikoak eta gaikako hitzaldiak biltzen ditu, publiko guztiarentzat hausnarketa eta gozamenerako gune bat eskainiz. Aurrerantzean tabernen zikloa iragarriko dutela aurreatu dute antolatzaileek.
Konfirmazioak falta diren arren, Santas Pascuas jaialdian izango diren hainbat artista euskaldunen izena aurreratu dute dagoeneko: Bizardunak, Eneritz Furyak, CastaZabal, Ke Lepo & Felix Buff, Tatxers, EZEZEZ eta 'Irakurtzeko musika' zikloaren baitan Anari Nacho Vegasekin batera.
Bestelako artisten artean nabarmetzekoak dira Rita Payés, Sanguijuelas del Guadiana, Cycle, Rufus T. Firefly, Hinds, Parquesur, Exnovios, Cristina Martinez edota J'aime, besteak beste.
Mikel Muruzabal Studiok diseinatu du hamargarren edizioaren irudia, Afari Santuaren kontzeptua ekarri du irudira artista eta musikari nafarrak protagonista direla. Jaialdiak urteetan zehar sustatu duen komunitatea eta batasuna irudikatu nahi izan dute horrekin.
Sarrerak dagoeneko salgai daude jaialdiaren webgunean eta programa osoa ere bertan kontsultatu daiteke.