2024ean abiatu zuen Iruñeko udalak Etxe bat proiektua, etxebizitza behar larrian diren pertsonei akonpainamendua eskaini, eta bizi duten bazterketa egoera atzean uzten laguntzeko. Espainiako Estatistika Institutuaren arabera 603 pertsona etxegabe daude Nafarroan, horietarik 130 kale gorrian bizitzen. Duela hamarkada bateko datuei begira, %80 hazi da etxegabeen tasa.
Balorazio baikorra egin dute erakundeek Etxe Bat programaren entsegu faseaz. Hamar familia eta 29 pertsona bakar aldi baterako udal bizitegietara bideratzeaz gain, alokairu sozialeko eta merkatu libreko etxebizitzetara bideratzea erdietsi zuten.
Datorren urteetan programa indartzeko xedea dute erakunde publikoek, artatu daitezkeen kasuak emendatzeko, bereziki etxebizitzaren arloan bazterketa egoeran diren familien kasuan. Nafarroako Gobernuak 170.167 euroko dirulaguntza baimendu dio ere Iruñeko Udalari, gai horren inguruan arreta-gune espezializatu bat sortzeko.
Iruñean abiatutako esperientzia lurraldeko beste 10.000 biztanletik gorako beste udalerri batzuetara zabaltzeko interesa erakutsi du Nafarroako gobernuak. Eta preseski, bost herritako 14 familiarekin abiatu dituzte jarraipen prozesuak.