Chuleria, joder! taldearen punk rockak itxiko du gaur Musika Aretoak Kalean zikloa. Uda osoan zehar Basotxoko oholtza musikaz bete dute taldeek aretoetako musika kaleetara eramanez.
Gaurkoa, Zentralen eskutik iritsitako proposamena da: Chuleria, joder!. Arratsaldeko 20:00etan hasiko da emanaldia, ohiko txokoan, Basotxoan.
Aramaioko Anttonek eta Mamarigako Iratxek eman zioten hasiera taldeari eta akordeak jo ahala, musik aberria egin, eta taldea zabaldu zuten. Egun, lau lagunek osatzen dute taldea eta gaztetxe batean sortutako taldeak, oholtza handien jabe egin da dagoeneko; betiere nondik datozen ahaztu gabe, eta autogestioan sinistuta.
Iruñeko Udala eta Navarra Music Commission dira Musika Aretoak Kalean programaren bultzatzaileak, hiriko edukiera txikiko eta handiko aretoek antolatzen duten zirkuitua balioetsi eta babesteko xedez.