Mila etxebizitza-babestu berri eraikitze bidean nahi ditu Iruñeko Udalak, bi eta lau urte arteko epean. Horietarik azkenak Buztintxuri auzoko Maiatzeko Plazako Amen karrikako disuasio-aparkaleku baten gainean eta Sadar inguruko Nafarroa Arena ondoko orube huts batean altxatuko dira. Orotara, salneurri mugatuko 165 bizitegi berri eraikiko dira, horien ia erdia alokairuan.
Jarduera ekonomikorako, merkataritzarako eta bulegoetarako aurreikusiak ziren bi oruberen erabilera aldatuko du Iruñeko Udalak, proiektua egikaritzeko. Orube horiek jada eraikigarriak izanik, eraikuntza lanak abiatzeko izapideak arinagoak izanen dira. 2027an hasiko dira eraikuntza lanak Sadar inguruan, eta 2028an Buztintxuri auzoan. Bi proiektuen kasuan, inguruko biztanleen iritziak biltzeko prozesuak irekiko dira proiektuen nolakotasunez hausnartzeko
Buztintxuri – Euntzetxikiko orubea Maiatzeko Plazako Amen karrikan da Gipuzkoa etorbidearen ertzean, Berriozar eta Iruñea arteko mugan. UPNk aldameneko Mercadona saltegiaren eskutan utzi zuen gunea, doako disuasio-aparkaleku gisa baliatua izan zedin. Bertan, 80 bizitegi sortzea da asmoa, zortzi solairuko bi edo hiru eraikinetan banaturik. Horien %30 alokatzeko izanen dira, eta %70 salerosketarako. Proiektu parte hartzailean, bereziki, eraikin-multzoaren diseinua izanen da eztabaidagai.
Sadarreko proiektuaren parte hartze prozesuan landuko den proposamenak hiru aukera aurreikusten ditu lurzatia urbanizatzeko: 85 etxebizitzako eraikin bakarra, beheko solairu komertzial batez baturiko bi etxebizitza-eraikin, edo azpiko bi solairu komertzial bereizi dituzten bi eraikin.
Sadarreko proiektuaren parte hartze prozesuan landuko den proposamenak hiru aukera aurreikusten ditu lurzatia urbanizatzeko: 85 etxebizitzako eraikin bakarra, beheko solairu komertzial batez baturiko bi etxebizitza-eraikin, edo azpiko bi solairu komertzial bereizi dituzten bi eraikin.