“Eskolako komunitatea batu gara sinadura bilketa batean izen aldaketa eskatzeko” azaldu du Euskalerria Irratia Joseba Ezeolaza, memoria historikoan aditua eta eskolako gurasoa, “Memoria historikoa, memoria feminista eta memoria historikoa, eskola publiko batean biltzea oso aproposa iruditzen zitzaigun”. Izena ez dute nolanahi hautatu, “Camino Oscoz Santo Domingo kalean jaio eta bizi izan zen eta bertan ere atxilotu zuten, haur eskolako sarreratik metro gutxira” aipatu du Ezeolazak.
“Camino Oscoz maistra errepublikazalea zen, alderdi komunista eta Socorro Rojoko militantea zen” azaldu du irratian Oscozen figura liburu batean landu zuen Joseba Ezeolazak, “Guesan egon zen irakasle eta bertan genero berdintasuna bezalako kontzeptuak lantzen hasi zen edo ta eskolarendako material modernoen eskaria borrokatu zuen. 1936ko uztailean atxilotu zuten falangistek eta handik hamar egunera Urbasatik amildu zuten”. Alde Zaharreko eskolari Maria Camino Oscoz izena jartzea beraz, memoria historiko ariketa da. “Iluntasunetik atera behar ditugu horrelako adibideak, gaur oso barneratuak ditugu genero berdintasunari buruzko kontzeptuak, baina duela ia ehun urte Camino Oscoz hasi zen horiek lantzen Guesako eskolan; beraz eredu feminista, errepublikazale eta aurrerakoiak Iruñeko paisai urbanoan nabarmendu nahi ditugu”.