Gizonezkoen osasunak gaur abiatuko du 2025-2026ko denboraldia. Osasunak Real Madrilen aurka jokatuko du gaur, Santiago Bernabeun, iluntzeko 21:00etan.
21 urte dira gorritxoek ez dutela Bernabeun irabazi eta geroztik, hiru berdinketa baino ez dituzte lortu. Gainera, Alessio Lisci entrenatzaileak taldea gidatzen lehenengo partida ofiziala izango du gaurkoa.
Denboraldiaurreko emaitzak gorabeheratsuak izan dira taldearentzat, hasiera ez baitzen erraza izan, baina amaieran bi emaitza on lortu dituzte. Italiarraren gidatzeko erara moldatzeko balio izan dute beroketa lanek eta gaur izango dute lehenengo erakusleihoa.
Gaurkoa lehenengo partida izanen da, etxetik kanpo, eta asteburuan, igandean, etxeko lehenengoa jokatuko dute gorritxoek Valentziaren kontra, arratsaldeko 17:00etan Sadarren.