Lehen aldiz, Iruñeko Udalak bero-boladak irauten duen bitartean etxerik ez duten pertsonei arreta emateko jarduera protokoloa jarri du martxan. Unean uneko neurriak aplikatu beharrean, protokolo bat finkatu nahi dute.
Proiektu pilotua izango da momentuz, eta etorkizunean, baliabide-sistema hori Bazterkeria Handiko Programa arautzen duen Ordenantzara eramango da, eta araudi horrek, gaur egun, hotz-boladak bakarrik hartzen baititu kontuan.
Muturreko tenperaturen egoera gertatzen denean, eta Nafarroako Gobernuak hala ezartzen duenean, Udalak, etxegabetasun-egoeran dauden pertsonei hurbilagotik jarraitzeko, baliabideak aktibatzen ditu. Besteak beste, Etxerik Gabeko Pertsonentzako Arreta Zentroko edukiera 50etik 58 plazara handituko dute. Eta zentroan dauden pertsona ibiltariei edo erroldatuta ez daudenei egun bat luzatuko zaie egonaldia, hala eskatzen badute; beste herri batzuetara joateko aukera ere eskainiko zaie.
Lehentasuna emango zaie egoera ahulean dauden pertsonei: adingabeak, gaixo dauden pertsonak, 65 urtetik gorakoak eta bakarrik dauden emakumeak. Adingabeak kalean dituzten eta hirian erroldatuta dauden familien kasuan, gizarte-zerbitzuek beste egoitza-baliabide batzuk jarriko dituzte eskura.