Sanferminetako entzierroa perfektua eta ukiezina den tradizioa ematen duen arren, urtero urtero festetako goizetako lasterketa hobetzeko proposamenak aditzen dira. Azken urteotan ikusi da zezenen abiadura biziak, tentsio une larriak eragiten dituela Estafeta karrikaren amaieran, zezen plazara jaitsi aurreko tartean. Zezenak azkar iristen dira horrat eta eskuin hesiaren kontra talka egiten dute, bertan pilatuta, babes bila geratzen diren pertsonen kontra eginez. Iruñeko Peñen Federazioak egoera hau ekiditeko proposamena egin du. Eskuin hesi hori, hesi itsu bihurtu, hau da, hesia ohol handi batekin erabat estaltzea, Mercaderes eta Estafeta arteko bihurgunean egiten den moduan. Honela, korrikalariak bertan gelditzea ekidingo da eta jende pilaketarik ez da egonen. Hori bai, segurtasuna bermatzeko, hesiaren azpialdea irekita izanen da, arriskua egotekotan ihes bidea topa dezaten entzierroko lasterkariek.
Peñen Federazioak, Santo Domingoko polizia hesia ere, goizago kentzea eskatzen du, lehen suziria entzunda, pilaketarik eta erorikorik izan ez dadin. Proposamenek, entzierroko ohiko parte hartzaileen babesa dute eta apirilaren 4ko entzierroaren mahaian eztabaidatuko dira.
