Iruñeko Askatasunaren plazan, Euskal Herrian frankismoari gorazarre egiten dion eraikinik handienaren aurrean elkartu ziren larunbatean milaka herritar, manifestazio jendetsuan EH Bilduri, PSNri eta Geroa Bairi eskatzeko egindako «okerra» zuzentzea eta Erorien Monumentua adieraberritzeko eta eraldatzeko akordioa moldatzea, eta «eraisteko akordio» bihur dezatela.
33 elkarte memorialistak eta beste hainbat kolektibo eta sindikatuk deitutako manifestazioa izan zen larunbatekoa eta Gazteluko plazan amaitu zen, El Drogas, Ilargi Gorria, La Chula Potra eta Fermin Balentziak parte hartu zuten ekitaldiarekin.
Ekitaldian eraikinaren eraistea irudikatu zuten eta kartoiarekin egindako eraikina suntsitu eta bota zuten, kaskoak eta mailuak jantzita. Aldiberean, frankismoak errepresaliatutako emakumeen izenak irakurri zituzten ekitaldian. Diskurtsoan, plataformako ordezkariek gogora ekarri dute 36ko gerra jasan zuten senideen “amets” bat zela frankismoaren gorazarrerako eraikin hori kentzea eta berriz ere alderdiei eraikina eraistea galdegin diete.