Nafarroako Museoko langileek elkarretaratzea egin dute astearte honetan, AFAPNA, ELA, CCOO eta UGT sindikatuek deituta, eraikinean hasiko diren obrak direla-eta egingo diren bost kaleratzeen aurka protesta egiteko.
Eraikinean aurreikusitako obren ondorioz, urrira arte gutxi gorabehera, aldi baterako kontratatuta dauden bost langile kaleratu egingo dituztela jakinarazi du Nafarroako Museoko zuzendaritzak. Zerbitzu Orokorretako bost lanpostu dira eta UGTk salatu du kontrataziorako epea oposizioan dagoen lanpostu hutsa bete artekoa zela".
AFAPNA, ELA, CCOO eta UGT sindikatuek erabakia berriz aztertzeko eta aldi baterako kontratuak ez eteteko eskatu diote zuzendaritzari. Era berean, obrak egin bitartean Museoen Zerbitzuko edo Kultura Departamentuko beste lanpostu batzuetan birkokatzea galdegin dute.
Alternatibak proposatu dituzte sindikatuek, “irudimenarekin aukerak egon daitezke”, adierazi dute. “Langileen arteko txandakako prestakuntza, esaterako, edo baita obrak pisuka, aretoka egitea ere, dena aldi berean ez ixtea, hori baita langileei buruz argudiatzen dutena”, azaldu dute.
