Ikasturteko programazioa aurkeztu du Txantreako Jai Batzordeak, eta bigarrenez, Antzerki Zikloa antolatu dute iaz izandako arrakasta ikusita. Lau emanaldi izango dira guztira, euskarazko bi eta gaztelaniazko beste bi eta emanaldi guztiak Salestarretan izango dira.
Aurten gainera berrikuntza nagusiarekin dator zikloa, musu-truk izango da, nahiz eta saio guztien amaieran ikusleek diru ekarpena egiteko aukera izango duten. Txantreako bizilagunei kultur eskaintza zabala helarazi nahi die ekimenak. Hartara, sexualitatea, errefuxiatuak, memoria historikoa edota emakumeen presentzia artean jorratuko dute antzezlanok.
Urriaren 4an izango da lehen emanaldia: SexCurso. Auzotegiko antzerki taldearen eskutik iritsiko da antzezlana Salestarren antzokira, iluntzeko 20:00etan. Hamabost egun beranduago, euskarazko Markelen maleta taularatuko du Sakonera Produkzioak taldeak, arratsaldeko 18:00etan. Azaroaren 8an Iluna Producciones taldeak Ezkaba lanarekin helduko dio memoria historikoari, iluntzeko 20:00etan. Azkenik, Jaiaren erregina: Inpostora baten showa ekarriko du Garazi San Martinek oholtzara, azaroaren 22an, 20:00etan.
