Txuria ere atera du Karrikirik dendako erakusleihora. Eskaintza berezia dute sanferminetan, askotarikoa, eta euskalduna. Itxaso Agirrek zabaldu dizkigu dendako ateak Sanfermintza saioan eta azaldu bezala, sanferminetan ere Karrikiriren aldarrikapenak izaten dira nagusi.
“Gehien saltzen duguna kamisetak dira”, adierazi du Agirrek. “Zapiak eta galtzak ere saltzen dira, baina batez ere kamiseten bila dator jendea. Euskaren alde eta zezenketen kontrako kamisetak saltzen dira gehien”, nabarmendu du.
Hala ere, ez dute betiko eskaintza baztertu. Jostailuak, liburuak, diskoak eta askotariko materialak saltzen dituzte Karrikirin sanferminetan ere. Sanferminetan Karrikiri oasi txiki bat dirudiela dio Agirrek. Lehenengo egunak mugituak izan dira eta orain, “beste patxada batekin, baina oso gustura” daudela adierazi du. Goizez dago zabalik Xabier karrikako txokoa, 10:30etatik 14:00etara, adin guztietarako bezeroak artatzeko prest.
