"Lorik ia egin gabe eta gosaria irensteko ia aukerarik gabe" daude Aritz Ibañez eta Itsaso Martinez Duguna dantza taldeko kideak. "Burua hotz mantendu eta esan beharrekoa esateko indarra gordetzen ari gara", esan dute txupinazoa jaurti aurreko minutuetan. "Taldean disfrutatzeko eguna da gaurkoa. Elkarrekin ospatu eta maitasuna elkarri emateko uztailaren 6a izanen da bereziki aurtengoa", adierazi dute. Dantza da sanferminetako osagai nagusia askorentzat eta dantza genero guztiak ordezkatu nahiko lituzkete txupinazoan: "Dantzak merezi du horrelako aitortza bat". Datozen egunetan, prozesioan aterako dira, uztailaren 7an eta 14an eta udaletxeko plazan arituko dira. "Has gaitezen dantzan guztiok", esan dute, kontent.
