2008ko uztailaren 7an Jose Diego Yllanesek Nagore Laffage bortxatu eta erail zuen. Igandean hamasei urte beteko dira eta hartara, omenaldia egin zioten atzo Lunes Lilas kolektiboko kideek. Nagore ez ezik biolentzia matxistaren biktimak diren emakumeak omendu dituzte. Izan ere, aurten, 657 salaketa jarri dira Nafarroan indarkeria matxistagatik eta 51 feminizidio izan dira.
Beste behin ere, Asun Casasola Nagoreren amak eskerrak eman dizkie iruindarrei eta jasotako babesa nabarmendu du. Izan ere, Casasolak adierazi bezala herritarren konpromiso honek ahalbidetu baitu Jose Diego Yllanesek egindakoa ahaztua ez izatea.
Azken hamasei urteotan aurrerapausoak eman direla azpimarratu du Lunes Lilasek. Esaterako, Nafarroan Sexu-indarkerietarako Arreta Integraleko Zentroa (SIAIZ) sortu dute. Hala ere, bide luzea dago egiteko biktima bat bera ere ez dagoen arte.
Felix Taberna Berdintasun kontseilaria, Unai Hualde Foru Parlamentuko presidentea, Joseba Asiron Iruñeko alkatea, eta UPN, PSN, Geroa Bai, EH Bildu eta Zurekin Nafarroako talde politikoetako ordezkariak ere izan dira omenaldian.
