2022ko uztailaren 14ean, sanferminetako azken zezenketa amaituta, Iruñeko plazan ziren Peñek festen agur ekitaldia egin zuten, urtero egin ohi duten moduan. Txarangak plazaren erdian jarrita musika jo zuten, Peñakideak harmailetan kantuan ziren bitartean. Peñen Federaziotik at den Mutilzarra Peñak ordea ez zuen ekitaldia errespetatu eta ekitalditik at, beren pankarta eta Peñarekin plaza erdira jaitsi ziren. Jarrera horrek haserrea eragin zuen harmailetan ziren peñakideen artean eta haietako zenbait Mutilzarrakoengana joan ziren kexuka. Une tentsoa izan zen, oihuak, irainak eta uneren batean zaplazteko bat ere izan zelarik. Fiskalak bere egin zuen Espainiako Poliziaren txostenaren arabera, “Ezker Abertzalearen inguruko Federazioko Peñetako kideek, gorrotoa diote Mutilzarra Peñari Nafarroako ikur ofizialak beren pankartan erakusteagatik”. 3 urteko kartzela zigor eskaera egin zuen fiskaltzak. Nafarroako Auzitegiak ordea, ez du horrelakorik ikusi eta epaian gertatutakoa une horretako tentsio unera mugatuta zegoela dio, ez ideologia politikoarekin loturiko eraso batetara. Epaiak azaldu du, Mutilzarra Peñak inolako arazorik gabe parte hartzen duela Sanferminetan eta 2022ko festa horietan beren pankarta normaltasunez erakutsi zuela plazan zein kalean.
Gauzak horrela, epaileak 360euroko isuna ezarri die bi akusatuei mehatxuengatik, beste horrenbeste ezarri dio hirugarren peñakide bati zaplaztekoa emateagatik eta aske, inolako zigorrik gabe utzi ditu beste bi pertsona.
