Alaine Agirreren 'Karena' liburua izanen da aurtengo Euskal Liburuaren Irakurketa Publikoan irakurriko dena. Goizeko 8:30etatik hasi eta 14:00etara, liburuaren atalak irakurriko dira Biurdana Institutuan. Baina ez hori bakarrik, izan ere gazteek idazlearekin bildu eta galderak egiteko tartea ere izanen dute, goiz erdian eginen den mahai-inguruan. Amaia Riesko ikastetxeko zuzendariak adierazi bezala, "besta bat izanen da, literaturaren besta bat". Aurten bere 23. edizioa izanen duen ekimenaren helburua argia da: "Ikasleen artean literatur zaletasuna sustatzea eta gazteei erreferente berriak edukitzeko aukera eskaintzea".
Iluntzeko 19:00etan idazleak hitzaldi bat emanen du, bestalde, Arrotxapeako Juslarotxa Civivoxean. Zuzendariak argitu moduan, biak ala biak ekitaldi irekiak izango dira, bertaratu nahi duen orori zuzenduak.
