“Soldata igoerarik ez badago, sukaldeko olioa ordain diezagutela” zioten kartelak eskuetan azaldu dira langileak Iruñeko eremu urdina kudeatzen duen Dornier enpresaren bulegoetara. “Nazkatuta gaude, enpresak ez duelako lan hitzarmena negoziatu nahi” azaldu dute sindikatuek, “Ekainean Udalak baldintza agiria aterako du eta ordurako enpresa barruan ez baditugu gure gutxiengoak ongi ezarrita, ezinezkoa izanen da egoerari buelta ematea”.
Azken urteotan galdu duten erosmen ahalmena jarri dute mahai gainean sindikatuek. “Enpresak dio ezin duela soldatarik igo eta %0ko igoera planteatzen du” salatu dute langileen ordezkariek, “Gaur egun hori onartezina da”. Dornierrek 150 langile ditu Iruñean, kalez kale dabiltzan zaintzaileak dira ezagunenak, baina badaude garabietako langileak, administraziokoak eta teknikariak ere.