Iruñeko Udalak Etxez Etxeko Arreta Zerbitzua bateratzeko lehen urratsak eman ditu. Iruñeko ELZ sozietate publikoa desegin ondoren, udal langileak soilik arduratuko dira adineko pertsonentzako etxez etxeko arreta zerbitzua eskaintzeaz. Orain arte ELZ sozietate publikoaren bitartez kudeatzen zen zerbitzuaren zati bat, eta orain, Udalaren esku egonen da zerbitzua bere osotasunean.
Udalak azaldu duenez, zerbitzuaren kalitatea hobetzea dago erabaki horren gibelean. Egun, Etxeko Arreta Zerbitzuak 814 erabiltzaile baino gehiago artatzen ditu, eta ia 200 profesionalek egiten dute lan. Langile gehienak, 175 inguru, Iruñeko Udalaren mende daude zuzenean, baina, 23 profesional enpresa publikokoak dira.
Hartara, zerbitzua bateratuta, lehentasuna emango diote lanaldi partzialeko kontratuak dituzten esperientzia eta antzinatasun handieneko langileen lanaldiak luzatzeari; eta gainontzeko langileak, kontratazio-zerrendan sartuko dira.
