Atzo gauerdian, aurretik iragarri gabe, zabaldu zuen Gorka Urbizuk Hasiera bat, bere bakarkako lehen diskoa, plataforma guztietan. Ordutik ez du adierazpenik egin, kantuei lehentasuna eman nahi dielako. Ongi neurtu nahi du zer esan, non eta norekin. Hori horrela, ostiralean, hilak 19, diskoaren aurkezpena eginen du Iruñeko Laba elkartean, Euskalerria Irratiaren eskutik. Juan Kruz Lakasta lankideak elkarrizketa luzea eginen dio eta Lekunberriko musikariak zuzenean bi kanta joko ditu, entxuferik gabe.
Sarrerak ostiralean bertan jarriko dituzte salgai, Laba elkartean, 17:00etatik aurrera. Euskalerria Irratian hiru sarrera bikoitz zozkatuko ditugu gure entzuleen artean, Metropoli Forala eta Irrintzi Plaza saioetan bana, eta webgunean bestea. Halaber, irratiak aurkezpena zuzenean emanen du FMko 98.3an zein euskalerriairratia.eus webgunean.
