Alderdi erregionalistak upn.org bere webgunearen barruan sortu du latraicionapamplona.com web orria. Horretan hainbat eduki eskegi ditu. Lehenik eta behin, Cristina Ibarrolaren kudeaketa goresten du, zentsura mozioaren argudio nagusia, Iruñeko Udala erregionalistekin geldirik zegoela, ukatu nahian. Horren ondotik, change.org plataformako zentsura mozioaren aurkako sinadura bilketaren informazioa eta lotura eskaintzen ditu.
Sostengu bilketa hori Javier Perez izeneko erabiltzaile batek jarri zuen abian, abenduaren 19an. “Denunciar al PSOE por la traición a Pamplona” (PSOE salatu, Iruñeari traizioa egiteagatik) du izenburu. Hamar lerroko testu laburrean Perezek azaltzen duenez, “PSOEk Iruñeko herritarrak traizionatu ditu EH Bildurekin, oraindik ETA gaitzesten ez duen alderdi horrekin, zentsura mozioa adostuz”. Haren aburuz, “ekintza horrek bidegabeki baztertu du alderdirik bozkatuena den UPN”, eta hala “aurrekari kezkagarria ezarri du gure politika nazionalean”. Esan gabe doa Espainiako politikaz ari dela. Lerrook idazteko tenorean, bilduriko sinadurak 660 ziren.
