PSNk, EH Bilduk, Geroa Baik eta Zurekinek gaur Iruñeko Udaletxean erregistraturiko zentsura mozioaren eskutik, Joseba Asiron Iruñeko alkate izanen da, berriro, abenduaren 28tik aurrera, egun horretan eztabaidatu eta bozkatuko baitute mozioa, eta indarrok udalbatzako 27 zinegotzietatik 16 dauzkate.
Lau indarron artean loturiko akordio politikoa aurkezteko tenorean, Asironek hitz eman du Udalaren azken urteotako “paralisia” gaindituko duela, erronkei aurre egiteko proiektuak bultzatuko dituela eta Iruñea “bizikidetza eta kontsentsu” hiria izan dadin lan eginen duela.
EH Bilduren eledunaren arabera, hori guztia lortzeko udal gobernu “egonkor eta partekatua” osatuko dute. “PSN udal gobernuaren parte izatea gustatuko litzaiguke, azken bi legealdietan oso lan emankorra egin baitugu elkarrekin”, esan du Asironek.
Lau indarrek adosturiko akordioaren arabera, “ahalik eta lasterren” onartuko dituzte 2024rako aurrekontua, baita zenbait proiektu estrategiko ere: etxebizitzaren ingurukoak, Sarasate pasealekuaren zaharberritzeari dagokiona, Erripagainaren egoeraren ingurukoa eta Sanduzelaiko biribilguneari buruzkoa, besteak beste.
Akordioak, halaber, aipatzen du Ikurren Foru Legea errespetatuko dela, baita Nafarroa Garaiaren egungo errealitate politiko administratiboa ere.
