Jon Alonsok (Iruñea, 1958) Carvalho Euskadin bere azken liburua aurkeztuko du gaur arratsaldeko 20:00etan, Zaldiko Maldiko elkartean. Patxi Larrionek aurkeztuko du eta Alonsok solasaldia eskainiko du.
Iruñea, 2016. Gobernu autonomiko berriak goi mailako kultur jardunaldi bat antolatu du, eta Sanchez Godin intelektuala ezusteko bat ematekoa da bertan: Manuel Vazquez Montalbanen nobela argitaragabe bat agertu da, Carvalho Euskadin izenekoa. Ezustekoa, ordea, nobelaren bat-bateko desagertzeak emango du, eta Jon Alonsoren protagonista ezagunaren, Enekoitz Ramirez Lanbasen, esku geldituko da kasua. Liburu baten barruan beste liburu bat sartu du Jon Alonsok eta haren pasarteak ere irakur daitezke.
Halaber, bi nobela batean harilkatu dituen lan honetan Bartzelonan ere kokatuko gara. 2003. urtean, Pepe Carvalho detektibea Ramblei begira dago, Guadalupe Agirre euskal enpresari handienetako baten enkargua jasoko duenean: 1982an desagertu zen Kokotxa militantearen neska-laguna aurkitzea. Ordainsari altua eskainiko dionez, aurrera egitea erabakiko du Carvalhok, giro arraro baten erditik: esan gabekoak, paper misteriotsuak, jarraipenak...
Jon Alonsoren lan berriak Euskal Herriko politika, janariaren zeremonia, historia hurbila eta literatur munduaren argi-ilunak lotuko ditu.
