Ezin hobeki margotutako koadro bat bezalakoa da drag-a. Oholtza, musika, ahotsa, publikoa, efektu bereziak, arropa, makillajea, atrezzoa... "Sexu eta genero rol hegemonikoak maskara bat dira, eta hankaz gora jartzen ditu drag-ak", azaldu du Rubiok. Drag queen, drag king eta drag queers mugimenduak izan ditugu hizpide; azken finean, cisheteroarautik aldentzen diren erreferenteak.
Euskal Herria "transformismoaren oasia" dela dio Rubiok. Diziplinak 100 urte baino gehiagoz egindako ibilbideak komunitate eta estilo ezberdinak uztartu ditu eta Euskal Herrian berezko nortasuna lortu du azken urteotan. Euskara ere izan da drag-a Euskal Herrian hedatzearen arrazoietako bat, aitortu du Rubiok.
