“Etxez-etxeko arreta zerbitzua udal kudeaketa zuzeneko zerbitzu bakarrean batera dadila”. Hori eskatzen du EH Bilduk, Geroa Baik eta Zurekin Nafarroak sinaturiko adierazpenak. Baita egun zerbitzua kudeatzen duen enpresa publikoa desegin dadila ere. Finean, “bete dadila Espainiako Auzitegi Gorenaren ebazpena, zeinaren arabera udalak zerbitzuko 162 langileak udalaren plantillan berrintegratu behar dituen”.
Adierazpena biharko osoko bilkuran izanen da aztergai, eta Maria Caballero zinegotzi erregionalista gaitzestea proposatzen du, "etxez-etxeko zerbitzuaren kudeaketa negargarriaren arduradun nagusia delako”. Adierazpenaren arabera, “alorreko buru moduan, berak ahalbidetu du zerbitzua bitan banatzea, deskoordinazio egoerak sortuz, eta erabiltzaileei eskaintzen zaien zerbitzua okertuz”.
