"20 eraso sexista baino gehiagoren berri izan dugu" azaldu zuen Iratxe Alvarezek Mugimendu Feministaren izenean Gazteluko Plazako eskenatokitik, "Nazkatuta gaude jaiak beraientzat bakarrik direla uste dutenekin, guk lekurik ez dugula pentsatzen dutenekin...mila modutan esan dugu eta berriro esanen dugu, ez dugu eraso matxistarik onartuko, hauek ere gure jaiak dira!". Peñetako txarangak isildu, taberna zein herri guneetako musika itzali eta herritarrek bat egin zuten eraso sexisten aurreko erantzunean. Eskenatokian bi pankarta, mugimendu feministarena eta 16 Peñen emakumeena. Mugimendu feministak dei zuzena egin zien iruindar ginezkoei: "Indarkeria hau ez da gure arazoa, emakumeena soilik" adierazi zuten, "Zuek gizonak, pausu bat aurrera eman behar duzue ere, aski da konplize izateaz, eskerrak emateaz, emakumeon hitza zalantzan jartzeaz. Gaitzezpenak plaza honetatik haratago joan behar du. Nazkagarri horiek,patriarkatuaren seme osasuntsu horiek kuadrilla, Peña, taberna eta kaleetatik kanpo nahi ditugu". Horregatik norberaren inguruan izan daitezken jarrera matxistei erantzutera dei egin zuen, "Jokoa amaitu zaiela erakutsi behar diegu, Koinatuak, babosoak baztertu...jakin dezatela ez ditugula beren jarrerak onartzen. Iruñeak ez duela inolako eraso sexistarik onartzen!".
Herritar, eragile, talde eta Peñekin batera, elkarretaratzean izan ziren Maria Txibite, jarduneko Nafarroako presidentea, Cristina Ibarrola Iruñeko alkatea, Unai Hualde Parlamentuko presidentea eta alderdi politikoetako ordezkariak.
