Iruñeko jarduneko alkate Enrique Maial alde bakarreko erabakia hartu du: Osasunak jaurtiko du 2023ko Sanferminetako hasierako Txupinazoa. Hori horrela, orain Osasunak berak erabaki beharko du taldearen izenean nork piztuko duen metxa. Udalak alkatearen erabakiaren berri eman bezain pronto, Luis Sabalza presidenteak prentsaurrekoa eskaini zuen, eta, argiki ez esanagatik ere, bere burua hautagai moduan proposatu zuen. “Oso litekeena ematen du presidenteak egun horretan zeregin bat edukitzea”, esan zuen.
